اتفضل اطلع بره !!…..(1)

انه الفردوس...
الروائح الزكية تغشى انفى تحملها نسمة هواء خفيفة.. و الموسيقى الحالمة تنبعث من لا مكان..قدماى تنغرزان فى بحر ذهبى من الرمال بينما انا غير عابىء..غير راغب فى الحركة من الاساس..يمتد بصرى  امامى فلا ارى سوى صفحة الماء الزرقاء صافية كما لم اشاهدها من قبل..انظر الى قرص الشمس الملتهب دون وجل و كأنى انظر الى بدر منير..جسدى يتمايل و يهتز  تلقائيا مع الموسيقى التى لا أدرى ما مصدرها..لكن عندما تكون فى الجنة لا تكثر من الاسئلة..
 

اشعر بشىء يوضع حول عنقى..حزام كبير من الورود المتفتحة زكيه الرائحة..لكن متى تحولت انا الى احد اثرياء هاواى؟؟ لا يهم..المهم من وضعته..او وضعنه..مجموعه من افضل ما رأيت من النساء فى حياتى..تباً لك يا (سارة) انتِ لم تكونى امرأة..تعالى و انظرى كيف يكون النساء..ارتدين كلهن الملابس (الهاواوية) التى رأيتها على التلفاز كثيراً..لكن الطبيعة شىء آخر..ما احلاكن !!..هذا يدعم نظرية الجنه..هاته النسوة هن الحور العين..لقد كافئنى الله على حياتى التعسة و اثابنى الى الجنة لأرفل فى النعيم الابدى..
 
دفعتنى احداهن برقة لأسقط على الشيزلونج المريح..ضحكت على مظهرى و انا اسقط..ما اعذبها و ما اعذب ضحكتها..اشرقت الوف الشموس و تفتحت ملايين الورود فى لحظة توقف فيها قلبى عن الخفقان..تقترب منى حتى خرقت حيزى المحيط..اشم انافسها فأشعر ان لعطرها يداً سحرية تعتصر روحى ذاتها من الداخل..رباه هذا أجمل من ان يكون حقيقياً..فقط لا تدعنى اموت الآن..شفاها تنفرج فى بطء ستبوح بسر خطير..سر حياتى كلها..ام تراها ستقبلنى؟؟ ثوان و نعرف..تقترب و تقترب..و تهمس فى اذنى:
" اتفضل أطلع بره !! "

**********

" انت يا بنى آدم..اتفضل قوم من هنا..عندك اوتضك قوم اتخمد فيها"
اليد القاسية على دقتها لأختى الصغرى (نهى) تهزنى بعنف لأستيقظ..يبدو انى نمت فى حجرتها مجدداً.. كالعادة استيقظت ساعة الفجر لأذهب الى دورة المياة فلم تأخذنى قدماى عودة الى فراشى بل الى حجرتها..ياله من حلم..ليته اكتمل..ليته كان..و الحمقاء اختارت اسوا لحظة لتوقظنى فيها..لى عشرة سنوات احاول معرفه كنه ما ستقوله الحسناء و دائماً يوقظنى شىء ما قبل لحظة التنوير..فكرت جدياً فى ان اوضع فى غيبوبة اختيارية لأعرف..

الشيطانه الصغيرة اختى تظن انها قد صارت انثى..بسنواتها التى لم تتجاوز الـ 15..تحارب من اجل خصوصيتها فى كل شىء..تقضى اوقات مطوله لتتزين امام مرآه دورة المياه بينما انا و أخيها نكابد الا نموت بأمراض الكلى من احتباس البول و نحن ننتظر بالخارج..اجد كل هذا مبالغ فيه..بصراحة اجد عسراً عندما انظر اليها فى ان لا ارى سوى الطفلة الصغيرة التى غيرت كوافيلها بيدى ذات مرة..بل مرات...
 

قمت من فراشها بعد ان ناكفتها و صارحتها انها قبيحة و جذبتها من شعرها الذى تعتنى به كثيراً حتى طردتنى من الحجرة مشيعاً بالسباب و الصراخ,بينما انا اقهقه فى لذه..هكذا يبدأ اليوم فعلاً..
غسلت وجهى و اخذت مكانى على مائدة الطعام..طبق الفول الشهى..ما اعذبك..ان تعرف ما اريده منك فلا تتظاهر بالخجل..يدى تمتد بلقمه فى حجم كفى لتنسف طبق الفول من اساسه,فاذا بيد اخرى اعرفها جيداً تسحبه من امامى...
 
" عندك"
صوت ابى الغليظ..يا فتاح يا عليم يا رزاق يا كريم..
" صباح الخير يا حج.."
" و الله يا بنى اللى يخلف فى الزمان ده ميشوفش خير فى حياته ابداً.. "
" صل ع النبى يا حاج" امى الطيبة
" عليه الصلاة و السلام..ملكيش دعوة انتِ يا اختى" تصمت متبرمة و هى تتمتم بكلام غير مفهوم..
" بص يا حبيبى..انت بقالك اد ايه متخرج؟؟ " لم ينتظر لأجيب,بل عد على اصابعه
" تلات سنين..اربعه غيرهم فى الجامعه..و اكتر من  عشر سنين قبلها فى التعليم..و كمان كام سنة قبل العلام عيل صغير لا شغله و لا مشغله ..قرب تلاثين سنه سعتك واقع على بخسارة..اكل و شرب و دروس..حتى لا مؤاخذه حمامك كان بيكلفنى..عارف ياض دافعلك كوافيل بكام و انت عيل؟؟"
 
" و ايه لزوم الكلام ده بس يا حج؟؟"
"لزومه يا عين امك ان سعتك بقالك تلات سنين واخد شهادتك و معملتش بيها حاجة..انا لو اعرف انك كنت هتاخدها عشان تعد بيها جنب والدتك انا كنت ريحت دماغى و ما علمتكش من اساسه..
انا يا بنى كبرت..و الاته المحلولة اللى عمال انت تطفح فيها خلصت..انا لسه عندى اخوك الصغير اهو لسه مخلصش..اهو مسيره فى يوم ييجى يعد جنبك..و المفعوصة الصغيرة شويه و يجيلها عريس و تعوز تتجوز..يعنى جهاز و بلاوى سودا مخك ما يستوعبهاش..كفاية يا بنى على اخواتك و انت ريحنى من همومك شوية..اشتغل يا اخى..اصرف على نفسك..خلى عند اهلك شوية دم.."

اغرق لعابه وجهى و اصم صياحه اذنى..لكنى لم اجرؤ على الاعتراض..فهو والدى قبل كل شىء..هذه الاسطوانه قديمة و مكررة..ربما صبيحة كل يوم..لكنه يبدو فى هذه اللحظة مصراً لن يزحزحه شيئاً الا وفاتى..الوريد الظاهر على جبهته اراه نابضاً بشده موشك على الانفجار ليغرقنى و الطعام فى بركه من الدم..امى تراقب ملتاعه عاجزة عن التصرف..بينما اخواى يراقبان الامر فى حياد ربما فى استمتاع ايضاً..
 

" ربنا يخليك لينا يا حج..حاضر..من عينيا..مقدرش اكسرلك امر..اوعدك هضور حالاً على شغل..بس اخلص الفطــــ....."
" يمين طلاق مغلظ على امك..البيت ده لا هتاكل فيه و لا هتنام فيه الا لما ترجع و تقولى انك اتقبلت فى وظيفه ليها دخل ثابت..."
امى تراقب ملتاعه غير مصدقه..لكنه ابى و اعرفه..سيطلقها فعلاً..و سأكون أنا السبب فى انهاء زواج دام لأكثر من ثلاثين عاماً...
اشار ابى الى الباب فى حركة درامية
" و دلوقتى البس هدومك..و اتفضل اطلع بره!!."

*************

نظرت الى مبنى الشركة العملاقة المهيب, فآلمنى عنقى و لم ابلغ آخره ببصرى..هل يمكن ان اتنقل فى وظائفه بجهودى حتى اديره يوماً ما؟؟ تقول:مستحيل؟؟ لا شىء بعيد على الله..لكن الكلام سابق لأوانه..لم انل بعد الوظيفة الصغيرة التى اتيت لأجلها بعد حتى اتمادى فى احلامى بأمتلاك المكان او ادارته..
 

جالس فى انتظار مسؤل التوظيف فى هذا المكان المهيب..بينما اشعر انى طالب فى انتظار امتحان شفهى ستتحدد عليه حياته كلها..هل سأجيب الاجابات الصحيحة؟؟ اتمنى..الراتب ممتاز و  الوظيفة مرموقة و الشركة لم ار افخم منها فى حياتى..

دق الجرس فأنتفضت من مقعدى كالكلاب فى تجربة بافلوف لألقى ممتحنى..اصلع وقور انيق على وجهه تعبير ممتزج من الاشمئزاز و الانشغال..هذه الصلعة اللامعة توحى بنظافة زائده وينعكس عليها الضوء كذلك..اشعر انى اتطلع الى مرآة و انعكاس وجهى الابله يطاعنى من على الجانب الآخر..هل الوح لنفسى كما افعل كلما رأيت انعكاسى؟؟ امسكت نفسى بالكاد كى لا اضحك فيضيع كل شىء..
 

منشغل هو بشده فى الاوراق التى امامه فلم يكلف نفسه حتى بالنظر الى..كلما هممت بالكلام صدمتنى نظرته الناريه فأتذكر اعلان المحمول الذى يضغطون فيه للشاب زر الرفض قبل ان يعرض ما لديه..ارجو الا يكون هذا حالنا هنا..ارجو ان تكون لدى فرصه و لو ضئيلة..بدأ هو بالكلام..
- مؤهلاتك؟؟
- بكالوريوس تجارة..تقدير جيد جداً..من الاوائل على دفعتى..
- جميل (ينطقها دون اكتراث)..و ما تعينتش فى استاف الجامعة ليه؟؟
- سعتك الدكتور كوسها لأبنه و خدت انا صابونه..
نظرات ناريه تدل انه يريد لو يذحبنى على سوقيتى..
- معاك لغات؟؟
- معايا شهادة التويفل فى الانجليزى سعاتك..و بعرف المانى على خفيف..كلمتين كده من ايام ثانوى..
- كمبيوتر؟؟
- معايا يا فندم شهاده معتمده من مايكروسوفت فى ادارة الشبكات..وواخد كورسات فى لغة السى و الجافا..
- جميل..جميل..
مجددا دون اى اهتمام..
-طيب عندك شهادات خبرة من اماكن شغل قبل كده؟؟
اخخخخخخخخخخخ
- بصراحة يا فندم..انا اتقدمت لوظايف كتير قبل كده و ربنا ما اردتش فى ولا واحدة..
للمرة الاولى رفع عينه عن الاوراق فى يده و نظر الى نظرة ملوها الصرامة..كنت اعلم ان الامر اجمل من ان يكون..استعديت ان انصرف بكرامة..لكن....
- لازم يكون فى مرة اولى..مش مشكلة..اعتقد ان فى وظيــ......
ترررررررررررررررررررررررررررررن...

 
تباً..لقد كانت على طرف لسانه..كان سيقولها اخيراً..لكن لا بأس..ليمد الله فى عمره ليتمها بعد هاتفه..يالله لا تدعه يموت الآن...
اكاد اسمع صوت تشقق..وجهه الصخرى تلين ملامحه اخيراً,لتعبر عن..ابتسامة !! لا بل و يضحك ايضاً..غريب..كنت اظنه آله مكونه من دوائر مبرمجه على سحق احلام الشباب...

( اهلااااااااااااان يا سعاده الباشا...و الله زمان...فينك كده؟؟ كان الله فى العون..طبعاً مشاكل الدايرة ما بتخلصش..كويس و الله انا حنا بنخطر على بالك..يا راجل يا بكااااش !!..ده بس من ذوقك..و الله موضوع حته الارض لسه عطلان..همتك معانا بقى..و البيه الصغير اخباره ايه؟؟ آه طبعاً..هذا الشبل من ذاك السد..هيهيهيهيهيه..خلص اخيراً..يااااااه يا رجل ده بقالو عمر..بس ارجع و اقولك دراسة ايه و كلام فارغ ايه؟؟ هما اللى خدوا شهادات قبله عملوا بيها ايه؟؟ما هم متلقحين فى كل حته…..طبعاً فى..و ده سؤال يا باشا؟؟..و لو مفيش يتخلقلوا..احنا يرضينا البيه الصغير يحس بالزهق؟؟..يشرفنى بكره فى الوقت اللى يريحوا هيلاقى المكتب تحت امره...بالسكرتيره و البلاى ستيشن لو حب كمان (ههههههههههه)... لا يا راجل مؤهل ايه و كلام فاضى ايه..خليه بس يجيلى و ملكش دعوه..ما تنساش بس اللى اتفقنا عليه...سلاااام يا كبير..بلغ سلامى للمدام و الاولاد..فى حفظ الله يا باشا..)

الخط ينغلق..و الابتسامة تجمدت..و الضحك توقف كأنما كان موصولاً بقابس تم انتزاعه..و عادت الجهامة و الصرامه و النظرات النارية لتنصب على شخصى...
- متأسف يا بنى..انت غير مستوف للشروط..سيب رقم تليفونك و لو فى اي وظايف شاغرة انت مستوفيها هنكلمك على طول....

 

ثم..نفس الاصبع..اللعنة..
- بعد اذنك.. اتفضل اطلع بره !!

**********

البيت المتواضع لـ(سارة)..البيت حالته يرثى لها فى الواقع من الداخل و الخارج..حتى ندمت فى سرى على المال الذى اشتريت به علبه الشيكولاته  و انى لم اتبرع لهم به سائلاً,ليحسنوا اوضاعهم قليلاً..لكن انت تعرف..حين تحب احداً بشده فأنت لا ترى له من عيوب..بيتها صار عندى اجمل مكان فى العالم..هى نفسها ليست ملكة جمال فى ذاتها..لكنى حين انظر اليها اشعر انها أجمل امرأة فى العالم..
 

اليوم تمكنت بعد عناء من حجز موعد مع ابيها المتشكك لأقابله.. لماذا؟؟ ياله من سؤال فى غير محله..بالتأكيد ليس لمصارحته فى رأى فى منزله الآيل للسقوط..بل لطلب يد (سارة) حب حياتى الاول و الاخير..كنت اعلم انى لو احضرت ابى فسيتحول الامر الى مجزرة..كلاهما عصبى حار المزاج ضيق الصدر و اى نقاش بينهم سيتحول الى مشادة كلامية و عراك بالايدى..
جلست امامه فى ادب و عينى منصبه على علبه الشيكولاته امامى كانى اود ان آخذها و افر من هنا فرار النعام..نظرت الى خفه المنزلى فوجدت جوربه مثقوب و اصبع قدمه الاكبر يطل منه لينظر الى متحدياً..كتمت ضحكاتى بصعوبه..ياله من مظهر..
 

- نورت...
يقولها كأنه يبصق..لسان حاله يقول تناول واجب الضيافة و اخرج غير مأسوف عليك..
- ده نورك يا عمى..
-الله يخليك..انا افضل ندخل فى الموضوع من غير مقدمات طويلة..
فى صغرى كنت اعشق نوعا معينا من الحلوى لا توجد سوى عند بقال كئيب السحنة بشع الخلقة سىء الطباع لا اطيق التعامل معه..اشعر بذات الشعور الآن لا اعرف لماذا..
- الحقيقة يا عمى (سارة) كانت زميلتى فى الجامعه لمدة اربع سنين..الشهادة لله بنت زى الفل..الكل بيشهدلها بالخير و مفيش كلام غير على طيبتها و اخلاقها..بصراحة يا زين ما ربيت يا عمى..
- همممممممممممممم؟
يالك من وقح...
- انا بصراحة نويت اكمل نص دينى..و مش لاقى لنفسى عروسة افضل من بنت حضرتك..انا يا عمى يسعدنى و يشرفنى انى...
- مفهوم..مفهوم..
سأقتل هذا العجوز..سأقتله..
- طيب ممكن اعرف: عندك شقة و لا لأ؟
- لأ..
- شقة الوالد واسعه و هتعدوا معاه فيها؟؟
- لأ..يا دوب مكفية العيلة بالعافية..
- مرتب شغلانتك كام؟؟
- و الله يا عمى لسه معرفش..انهارده كان اول يوم..
- يعنى حاليا مفيش وظيفة ثابته؟
- لأ..بس ان شاء....
- مفهوم..عندكوا اراضى اطيان املاك؟؟ وارث اى حاجة من اى حد؟؟
- لأ يا فندم..الوالد معندوش غير دخله..
- يعنى مش هيساعدك بحاجة؟
- هو ما حيلتوش حاجة يساعدنى بيها اصلاً..كمان انا عاوز اعتمد على نفسى...
 
ابتسم و لم يعلق..
- طيب يا بنى حط نفسك دلوقتى مطرحى..
انت جايلى من غير مصدر دخل و من غير شقة و من غير حاجة خالص و عاوزنى اجوزك بنتى..طب ازاى؟؟
- مهو يا عمى انا لسه صغير  و فى اول حياتى..شوية بشوية الامور هتتحسن و كل اللى حضرتك بتقول عليه ده هيتحل..
- موت يا حمار..تكون البنت عجزت و عنست و حضرتك لسه قاعد بتحلم بالعش الجميل..اسمع يا بنى..انا بنتى عاوز اطمن على مستقبلها..عاوز اديها للى يعيشها كويس..نفسى تعيش عيشه احسن من اللى هيا عايشاها دلوقتى..حاجة ملامحها واضحة..نفسى تسكن فى فيلا فى (التجمع) ..نفسى تصيف فى شاليه فى (مارينا)..نفسى ما تتعبش فى حياتها بعد كده..هى بنتى و من حقى اطمحلها فى الاحسن..تقدر تقولى هتوفرلها انت ده ازاى و انت اصلا اساسيات الحياة مش قادر عليها؟؟
الجواز يا بنى مسؤليه و انا شايف انك لسه مش قدها..اصرف نظر عن الموضوع ده و جرب لما ظروفك تتحسن مع حد تانى و ما تظلمش بنتى معاك..انا آسف يا بنى مش هقدر اتمم الموضع ده...
 

(تجمع)؟؟ اهو اعمى كى لا يرى عش الفراخ هذا الذى يحيا فيه ؟؟ و (مارينا)؟؟ كم رغبت فى هذه اللحظة لو اخبره  ان جوربه مثقوب...
- و دلوقتى اتفضل اشرب العصير و........
- اخد الشيكولاته و اطلع بره مش كده؟؟
- برافو عليك..بس الشيكولاته هتسيبها..متشكرين..

و دلوقتى اتفضل اطلع بره !!

*************

شعرت بالضيق من كل شىء..هاقد ضاعت الزيجة كما ضاعت الوظيفة من قبلها..تباً للحياة تضيق الخناق من كل جانب..حتى المنزل محروم انا من دخول ان عدت خال الوفاض..لم اجد مكانا اذهب اليه خير من بيت الله..
 

صليت بخشوع و دعوت الله ان يفرج الهم و يرفع البلاء..فلم يعد لدى سواه التجأ اليه..فرغت من الصلاة و هممت بالخروج فسمعت الصوت العالى لشجار..هنا فى المسجد؟؟ غريب..
شيخ شاب ملتح يرتدى جلباباً ابيضاً نظيفاً..ضخم الجثة الى حد مهيب..يوحى انه ربما مصاب بداء العملقة..و رجل آخر فى مثل سنه اسمر البشرة حليق الرأس يرتدى ثياباً عادية..
- الاستاذ لا بس بنطلون طويل.." مزبل"..لا مؤاخذه بيلم الوساخة و النجاسة من الارض و ييجى بعد كده يدنس البيت الطاهر هنا...ليه و ليه بقى انا بنصحه..تاخده طبعاً العزة بالاثم و يجادل و يناور زى كل العلمانين قاتلهم الله..
- و انت مالك يا اخى..البس بنطلون و لا البس جيبة..اهو ده اللى انت فالحين فيه..انما الامور المهمة تغموا عينكو عليها..الله يرحم قبل الثورة ايام مكنش حد بيسمعلكوا صوت...
- دين ربنا يا جاهل مفيهوش مهم و مش مهم..الدين واحد..يا تاخده كله يا تفرط فيه كله..و بعدين احنا ما فرضناش نفسنا على حد..الشعب هو اللى اختار..الشعب قال "نعم" للاسلام..
- "غزوة الصناديق"؟؟ يا اخى اتكسف..و انت مين اللى فوضك تعلم الناس دينها؟؟ انت شايفنى قدامك ملحد..انا مسلم زى زيك..انتم عاوزين ترجعونا الف سنة لورا..الديموقراطية هى الحل...
- و الديموقراطية اختارتنا احنا..و انتوا بقى عايزينها ايه؟؟ عايزين امهاتنا تلبس البيكينى بأسم التحضر؟؟ الحل فى كتاب ربنا و شرع الله...
- اهتدوا بالله يا اخوانا..ده احنا فى بيت ربنا...
العبد لله...
كفا عن الشجار..و التقت اعينهما على وجهى و هما يلحظانى للمرة الاولى..
- و انت ايه دخلك يا حضرة؟؟ من حسن اسلام المرء تركه ما لا يعنيه..
- عمر ما البلاد هتتقدم طول ما الناس فيها لسه بتتعدى على شئون غيرها..
- اتفضل يا استاذ من هنا....
- ايوه بس ده بيت ربنا يا شيخ....
 

نظرة الوعيد فى عينه و اصبعه الطويل الذى فى حجم كفى يشير الى خارج فلم اجرؤ على الاعتراض...
- اتفضل اطلع بره !!

( يتبع )